மாலபே தனியார் மருத்துவ நிறுவனத்துக்கு எதிர்ப்புத் தெரிவிக்கும் வகையில் வடமாகாண வைத்தியர்கள் இன்று-02 ஆம் திகதி வியாழக்கிழமை 24 மணி நேர வேலை நிறுத்தப் போராட்டத்தில் ஈடுபடவுள்ளனர் என அரச மருத்துவ அதிகாரிகள் சங்கத்தின் வடமாகாண இணைப்பாளர் வைத்தியர் காண்டீபன் தெரிவித்துள்ளார்.
இது தொடர்பில் அவர் மேலும் குறிப்பிடுகையில்,
இந்த வேலை நிறுத்தப் போராட்டம் இலங்கை மருத்துவ சேவையின் தராதரம் பற்றிய போராட்டம், தரமற்ற மருத்துவர்களை அரசியல் செல்வாக்குக்காகவும், பணத்துக்காகவும் உருவாக்கி நோயாளர்களின் உயிரைப் பணயம் வைக்கும் அரசியல் வியாபாரிகளுக்கு எதிரான போராட்டமாகும்.
நோயாளர்களுடன் எங்களுக்கு நீண்ட காலப் புரிந்துணர்வுள்ளது. அவர்களின் தேவைகளை இதுவரை காலமும் வழங்கி வந்தோம், இனியும் வழங்கத் தயாராகவேயுள்ளோம். எனவே, நோயாளர்கள் எங்கள் நியாயமான கோரிக்கைகளைப் புரிந்து கொள்வார்கள்.
நாளைய தினம் வேலைநிறுத்தப் போராட்டத்தை முன்னெடுக்கவுள்ள போதிலும்தெல்லிப்பழை புற்று நோய் வைத்தியசாலை, ஏனைய வைத்தியசாலைகள் அனைத்திலும் அவசர நோயாளர் சேவைகள் நடைபெறும். அவசர நோய் அல்லது விபத்துக்களின் போது உடனடியாகத் தயங்காமல் வைத்தியசாலையை நாடுங்கள். அங்கு எமது வைத்தியர்கள் உங்கள் உயிர் காக்க எப்போதும் போலவே தயார் நிலையிலிருப்பார்கள் என்றார்.
0 comments:
Post a Comment