கடந்த ஆகஸ்ட் மாதம் நடைபெற்ற க.பொ.த உயர்தரப் பரீட்சையின் முடிவுகள் நேற்று வியாழக்கிழமை(28) அதிகாலை இலங்கைப் பரீட்சைத் திணைக்களத்தால் வெளியிடப்பட்டுள்ள நிலையில் யாழ். பருத்தித்துறை ஹாட்லி கல்லூரி மாணவன் சிறிதரன் துவாரகன் பெளதீக விஞ்ஞானப் பிரிவில் தேசிய ரீதியில் முதலிடம் பெற்றுச் சாதனை படைத்துள்ளார்.
அவரது சாதனை தொடர்பில் குடும்பத்தினர், கல்லூரிச் சமூகத்தினர் பெரும் மகிழ்ச்சியடைந்துள்ளனர். இந்நிலையில் சாதனை மாணவன் தனது பெறுபேறு தொடர்பிலும் வெற்றிக்கு காரணமாக அமைந்த விடயங்கள் தொடர்பிலும் எமது செய்தச் சேவைக்குப் பிரத்தியேகமாகக் கருத்துத் தெரிவிக்கையிலேயே மேற்கண்டவாறு தெரிவித்துள்ளார்.
இது தொடர்பில் அவர் மேலும் தெரிவிக்கையில்,
நான் யாழ். புற்றளை வித்தியாலயத்தில் என்னுடைய ஆரம்பக் கல்வியை மேற்கொண்டு தரம்-05 புலமைப் பரிசில் பரீட்சையில் சித்தியடைந்தேன். புலமைப் பரிசில் பரீட்சையில் சித்தியடைந்த காரணத்தால் பருத்தித்துறை ஹாட்லிக் கல்லூரிக்குத் தெரிவானேன். இந்தக் கல்லூரியில் கல்வி பயின்று க.பொ. த சாதாரண தரத்தில் சித்தியடைந்த நான் க. பொ. த உயர்தரத்தில் கணித- விஞ்ஞானப் பிரிவில் இணைந்து கல்வி கற்றேன். இந்தத் துறையில் நான் கொண்டிருந்த ஆர்வத்தினால் ஊக்கத்துடன் கல்வி கற்றுத் தற்போது தேசிய நிலையில் முதல் மாணவனாகத் தெரிவாகும் நிலையை அடைந்துள்ளேன். இது மிகுந்த மகிழ்ச்சியளிக்கிறது.
நான் சிறந்த பெறுபேறு பெறுவதற்குக் காரணமான எங்களுடைய கல்லூரியின் அதிபர், கற்பித்த ஆசிரியர்கள், எனது குடும்பத்தினர் அனைவருக்கும் எனது மனமார்ந்த நன்றிகளைத் தெரிவித்துக் கொள்கின்றேன் என்றார்.
சாதனை மாணவனின் பெற்றோர்களின் பார்வையில்......
ஐந்தாம் தரப் புலமைப் பரீட்சைக்கு எம்முடைய மகன் தோற்றிய போது நாங்கள் கூடுதல் கவனம் செலுத்தவில்லை. அவர் இயல்பாகக் கற்று புலமைப் பரிசில் பரீட்சையில் சித்தியடைந்திருந்தார். ஐந்தாம் தரம் வரை அவரது கற்றல் தொடர்பில் நாங்கள் கட்டுப்பாடுகள் எதுவும் விதிக்கவில்லை.
(தொகுப்பு:- செல்வநாயகம் ரவிசாந்-)
0 comments:
Post a Comment