யாழ். கோண்டாவில் கிழக்குப் பகுதியில் குப்பைகள் கொட்டுவோருக்குக் கடும் எச்சரிக்கை விடுத்து இன்று வியாழக்கிழமை(14.12.2017) ஒட்டப்பட்டுள்ள அநாமேதயச் சுவரொட்டிகளால் அப்பகுதியில் பெரும் பரபரப்பு ஏற்பட்டுள்ளது.
தென்னிந்தியச் சினிமா நடிகர் சூர்யா வாள் ஏந்தி நிற்கும் புகைப்படத்துடன் இந்தச் சுவரொட்டிகள் ஒட்டப்பட்டுள்ளன.
"எச்சரிக்கை" எனும் தலைப்பிடப்பட்டு ஒட்டப்பட்டுள்ள மேற்படி சுவரொட்டியில் குறிப்பிடப்பட்டுள்ளதாவது,
அன்பான தனியான வாகன உரிமையாளர்களே! மேற்படி தங்களின் வாகனங்களில் தினமும் காலை-09 மணி முதல் மாலை-05 மணி வரை இப்பகுதியில் கழிவுகள் கொட்டப்படுவதை அவதானித்து வருகின்றோம்.
மேற்படி சம்பவம் தொடரும் சந்தர்ப்பத்தில் தங்கள் வாகனங்கள் அடித்து நொறுக்கப்படுவதுடன், வருபவர்களுக்கும் சேதம் விளைவிக்கப்படும் என வாசகம் எழுதப்பட்டுள்ளது.
சுவரொட்டிகளுக்குக் கீழ் தகவல்- தங்களின் பாசமான நண்பர்கள் எனவும் தெரிவிக்கப்பட்டுள்ளது.
இதேவேளை, குறித்த சுவரொட்டிகளை ஓட்டியவர்கள் யாரென்பது இன்னமும் தெரியவரவில்லை என்பதும் இங்கு குறிப்பிடத்தக்கது.
0 comments:
Post a Comment